上海肇嘉浜路浪車水馬龍，邪氣個鬧猛；走到靠近東安路個地方打只彎，穿過一條小馬路再朝左轉，就一記頭清淨下來了。眼門前是一扇黑顏色個大門，兩旁邊各有一棟紅瓦坡頂個二層樓洋房，門牌號是肇嘉浜路687弄7號搭仔8號。搿就是上海灘風雲人物劉鴻生個故居。1950年到1956年，劉鴻生勒搿棟洋房裡，度過了伊人生最後個時光。
走進劉鴻生個人生，最吸引我個是伊個一段經歷：從一個撥開除脫個大學生到中國邪氣有名個大老闆。
劉鴻生1888年生勒上海，6歲到梅溪書院讀書，7歲個辰光父親因病去世，全家陷入困境。伊刻苦學習，13歲考上聖約翰中學，4年以後進了有「東方哈佛」之稱個聖約翰大學。眺望前方，美麗個前景勒等牢仔伊。
災難總歸是勒人勿注意個辰光突然降臨個，讓人措手不及。上大二個辰光，聖約翰大學校長卜舫濟召見伊，學堂要保送伊到美國留學，4年以後回上海做牧師，月薪150塊，還撥伊一幢花園洋房，多少吸引人個前景啊！劉鴻生回去搭母親商量，第二日回復校長「我姆媽勿同意」。校長勃然大怒，指責伊「儂是上帝個叛徒」，野蠻粗暴個拿伊開除脫了。
美好個前景原來是海市蜃樓，18歲個劉鴻生離開了聖約翰大學，慌慌張張到處尋工作，最後尋到了英租界巡捕房一份翻譯工作，生活再算有了著落。
搿日天，伊父親個生前好友、寧波同鄉會會長周仰山來看伊。講起搭英商開平礦務公司上海辦事處卡爾德經理熟悉，辦事處剛好需要一個跑街，推銷煤炭，月薪100塊洋鈿，還有佣金。周仰山問伊是勿是願意試試看。劉鴻生當即表示願意，並再三感謝。
劉鴻生對煤炭行業一無所知，就日日夜夜刻苦鑽研。邪氣快個，伊就成為了煤炭專家，隨便拿起一塊煤就好判斷出伊個名稱、產地、成分搭仔特性，還可以講出伊個市場價格搭仔客戶群。伊上任做了嘸沒幾個號頭，開平煤炭勒上海個銷售就風生水起，一路飄紅，搿讓同行、老闆甚至對手儕感到意外。3年之後，開平礦務總公司大班英國人司諾召見劉鴻生，提升伊為有社會地位、工資又高個上海買辦。
劉鴻生帶勒阿弟劉吉生吃辛吃苦，跑遍了上海周邊個城鎮搭仔鄉村推銷煤炭。有趟，伊拉到了陶都宜興，劉鴻生看見燒窯用個儕是市場緊缺個木材，勿由得眼睛一亮。假使用煤炭代替木材，既解決了窯主個燃料來源問題，還好為伊拉降低一半成本，而伊個生意也會得源源勿斷而來個。
兄弟兩家頭勒酒樓請十幾位窯主吃飯，介紹改燒煤炭個好處，並請伊拉免費試用煤炭，窯主儕同意了。但是消息傳出去之後，一眼工人怕失業，包圍了劉鴻生伊拉蹲個旅館，高聲喊叫，要伊拉滾出宜興，否則就打煞脫伊拉，嚇得劉鴻生搭仔阿弟連夜搭船逃回了上海。
劉鴻生搭阿弟講：「改燒煤炭，要讓工人收入比原來好，要讓窯主有得好處，迭能介我伲再好成功。」
劉鴻生搭鍋爐專家還有工人到了宜興，送了十幾座以煤為燃料個陶瓷窯搭仔石灰窯，免費安裝；伊又用比較高個工資雇用工人燒煤。試燒出來個結果，是窯主滿意，工人開心，於是，開平個煤炭大量湧進宜興。劉鴻生做上海買辦3年，長江下游搭仔京滬沿線地區，儕成為了開平煤炭個主要銷售地區。
1930年，劉鴻生勒四川路造了一幢8層個大樓。拿自家個企業全部搬進大樓辦公，伊拉是：銀行、開灤煤炭售品處、水泥公司、大中華火柴公司、章華毛紡織公司搭仔保險公司等等。
就勒劉鴻生春風得意個辰光，母校聖約翰大學有人來拜訪劉鴻生，希望伊為母校捐資造一棟樓。劉鴻生想起了勒聖約翰受到個羞辱，必過最終還是答應了。當年開除劉鴻生個美國人卜舫濟校長，親手授予劉鴻生「名譽博士」學位，並聘請伊擔任校董。
人生路浪常莊會得有場景切換，常莊會得遭遇挫折，我伲唯一可以做個，就是學好一身真本領，勒生活個漩渦里逆流而上，再造人生。
劉鴻生個人生出師勿利，但是伊反敗為勝，締造了一個雄偉壯觀個企業王國。伊感嘆又欣慰個講：「短短几年推銷煤炭，讓我從一個貧寒個大學生成為了百萬富翁。」伊常莊搭後輩講，「只有學會真箇本事，再可以擔當大事體個！」