交關人用「華美」迭個詞來形容淮海中路，聽上去是勒講件錦袍。張愛玲講：「生命是一襲華美個袍，里向爬滿了虱子」，搿是屬於伊個見解，當然搭淮海路無關。假使拿淮海路比喻成件錦袍，葛末，原來是雍容華貴個「霞飛路」是面子，南昌路、淡水路、馬當路、長樂路、自忠路……等等，就是「夾里」。是迭些「夾里」馬路個品味，造就了淮海路個華美。其中有條撥大家經常忽視個小馬路：興安路，就有老多故事好講。
興安路勒淮海路以南，東起嵩山路，西抵雁盪路，總共只有五六百米，老上海人講起來是「一站路」。南北高架拿興安路一分為兩，從興安路個西頭走到東頭，要穿過天橋。
興安路築於1902年，只比淮海路小一歲。最初名字是「漢江路」，1907年以法租界公董局總董個名字更名為「麥賽爾蒂羅路」。1946年更名為興安路。或許有人認為，「興安」得名搭大小興安嶺有關，其實勿是個，興安是廣西個一隻小縣城，現在屬於桂林市管轄。淮海路周邊個小馬路有交關以小縣城命名，像桃源路、普安路、龍門路、柳林路……等等，興安路也勿例外。
九十年代之前個興安路，兩旁邊是密密麻麻個居民區，東段有得瑞康里、寶康里等石庫門，中段有祥茂新邨、三德坊、四明里等新式里弄。配合淮海路商圈個發展，南北高架以東個興安路已經老難尋得到當年個景象。高架以西還有大約一百米個興安路，仍舊有生機勃勃市井氣象。
講搿段興安路是淮海路個「夾里」，一點也勿為過。因為路北儕是婦女用品商店個後門，路南開滿了各色小店，水果店、餐廳、咖啡館……弄堂深深深幾許，還住過勿少名人。
興安路141弄鴻安坊搭重慶南路相通，四十年代，搿條弄堂以居住眾多醫生而出名。粗數數，6號沈偉昶、11號夏仲方、12號張萬超，16號個潮州和濟醫院，當然最有名個就是4號里個山東名醫魏指薪了。
當代中醫傷科名醫魏指薪（1896-1984），山東曹縣人，1925年，山東受自然災害，魏指薪29歲，一家頭到上海，除脫一襲長衫搭仔筆墨紙硯之外，所有個只有自家個一套祖傳傷科醫術。開始辰光，勒南市關帝廟（現在個復興東路）空地前頭擺攤教人家打拳，後來勒南市方浜路吉祥里掛牌行醫，因為醫術高超，逐漸有市場了。1937年抗戰全面爆發，伊搬進租界，住進鴻安坊，除脫開私人診所之外、還勒育才中學教武術維持生計。伊勒重慶南路辦個診所，囡兒女婿一家門五個人一道應診，一時傳為美談。魏指薪後來擔任上海第二醫學院（現在個交大醫學院）中醫骨傷科教授、瑞金醫院傷科主任等，老盧灣人看過「魏氏傷科」個人，勿在少數。
除脫診所，搿段興安路另一特色是「吃」。老多盧灣個老人歡喜南昌路雁盪路口個老店「潔而精川菜館」，搿家店原來開勒興安路浪個，門牌號是133號。1927年，潔而精剛剛營業，經營雲南風味，有得傳說講老闆是蔡鍔將軍個紅顏知己小鳳仙。到1937年，老潔而精生意淡了，新老闆轉而經營川幫菜餚搭仔揚州點心，一舉成功。尤其勒文藝界當中享有盛譽。周恩來歡喜個干煸牛肉絲，電影明星趙丹個心頭好是青豆泥，書畫家吳湖帆個最火系麻婆豆腐……畫家劉海粟歡喜潔而精個生爆鱔背，有題字「其味無窮」。1958年潔而精搬到科學會堂，到現在133個門牌還勒海，畫家賀友直先生曾經有幅「頂早個潔而精」，可以讓人想像伊當年個盛況。
雁盪路浪還有家大名鼎鼎個麵館「味香齋」，搭興安路也有老大個關係。四十年代，一個叫解豫凡個年輕人勒興安路171號開了西冷點心搭客飯個老店，因為生意紅火，又勒雁盪路開設西冷咖啡冷飲店，搿家經營咖啡冷飲個新店解放之後改名叫味香齋，從經營咖啡冷飲改為以麻醬拌麵小牛湯為特色。興安路浪個西冷老店解放之後是新光圖片攝影社個暗房。民國時代曾經有「華龍路上二西冷」（雁盪路原名華龍路）個講法，興安路是味香齋個起源。
現在搿段興安路，延續了當年「吃」個傳統，勒沿街個百年老門面里開出了交關新店。一家以「興安」命名個小餐廳，主打本幫特色，大眾化消費，引來眾多食客追捧。老闆曾經學過日本料理，從中得到靈感，研製出牛肉草頭、鹹蛋黃排條等邪氣有創意個菜品，搿些菜現在已經成為上海菜里個新經典。而興安餐廳廿多年還是原來個樣子，菜單是塑封列印個，濃濃個九十年代風。假使儂是熟客，伊拉會得默默個記牢，當儂移動平台下單辰光，帳單浪「門店老客戶」五個字，已經足夠讓人感到溫馨，下趟點單辰光，當然第一個想到個就是伊拉了。
興安路浪還有家老有特色個小店：徐其修涼茶。吃慣了罐頭涼茶個朋友假使到搿搭尋味，可能要有點小小個心理準備，因為伊個招牌蒲公英、魚腥草等，味道類似中藥，屬於「苦涼茶」，是有一定藥效個。徐其修是否是上海僅有個廣東涼茶鋪，我勿敢斷言。但筆者眼睛所看到個，經營正宗廣東涼茶個，其他地方好像還嘸沒看到過。既然到上海灘了，老廣也要入鄉隨俗。除脫苦茶，此地還有龜苓膏、芝麻糊、茅根竹蔗水、陳皮紅豆沙等廣東糖水。有苦也有甜，或者苦盡甘來，像極了我伲個生活。
一代又一代來自五湖四海個上海人勒搿搭生活，來來往往、熙熙攘攘。淮海路繁花似錦。背後個「夾里」溫暖貼肉。百來米短短個興安路，有一百廿年長長個歷史，啥人又好講伊，只是條「小」馬路呢。