梁詠琪11年下嫁西班牙籍老公Sergio後，近年兩公婆殺入時裝界，開高級童裝店Nanos。在疫市下，Gigi生意大跌，每個月更要背起近二十萬鋪租，都好大壓力！
日前身為老闆娘的Gigi親自出動做生招牌，拉大隊到位於銅鑼灣的利園分店開Live sell鋪頭產品，刺激消費。出心又出力，不知可以吸到多少客呢？
2018年，Gigi西班牙籍老公Sergio ，為了抽多點時間陪老婆同女兒Sofia，決定放棄雀巢公司的高薪厚職，轉行做生意。話說Sergio每一次返西班牙，都會去Nanos幫女兒入貨，於是啟發了他在香港代理Nanos童裝。鋪頭開了兩年，除有一班星級老友加持，兩母女不時齊齊做生招牌，令生意一直不錯。一年之後，更在尖沙咀開第二間分店。擁有兩間分店，單是鋪租都近二十萬，疫市下，據知童裝店生意額大跌得緊要，雖然吃力，但Gigi就說慶幸以往有儲錢習慣，更表示會同員工共渡時艱。
用血汗錢創業，為了守住這盤心血，兩公婆積極諗計，日前親自回鋪頭坐鎮，以其號召力刺激一下生意額。當日Gigi悉心打扮，到鋪頭準備開live，現場所見，Gigi相當嚴謹，連set機、擺位都好有意見，務求以最靚一面示人。期間Gigi更落力sell產品，包括媽媽用的奶粉袋、童裝衫、頸巾等等，順便同粉絲互動，送他們聖誕及新年禮物。至於，愛妻號Sergio當日負責做助手，幫老婆遞搓手液、紙巾，真夠細心！
面對嚴峻疫情，Gigi小心至上，除上鏡，其餘時間都罩不離口。平時常幫鋪頭做小Model的囡囡Sofia，當日則無現身。開完live，兩公婆留在鋪頭打點一下。正準備離開時，遇上大班看live趕來捧場的粉絲。那麼有心，Gigi當然識做，跟他們逐一簽名影相無托手踭。那麼有號召力，開live都算有成果啦！
Gigi在過去一年，除了推出新專輯，開了一場慈善演唱會之外，跟好多藝人一樣，工作因疫情進入寒冬。不過，換過角度看，就多了私人時間。設計系出身的她，趁空檔重拾興趣，報讀甜品班，又畫水墨畫、整陶瓷，還樣樣都學得有板有眼，Gigi說這段日子，就算吃老本都不緊要，因多點時間陪伴女兒，順便教她正確理財觀念，及儲蓄的重要性。踏入2021，希望這位與員工共度時艱的好老闆，挨過疫情重創，順順利利！